شذر الگلايد
شعر شعبي كاظم العطشان
عراقي
اسم الديوان
............................. شذر الگلايد
الشاعر..................................
كاظم العطشان
الطبعة
..........................................الثانية
سنة
الطبع.......................................2011م
عدد النسخ.................................. 1000نسخة
لــــــك
أخي ناظم
لم أمتثل
للوداع .. لأنَّكَ
كنت ولازلت
وستبقى معي...
فَنُمْ مُطمَئناً..
أخــــــوك
الإهداء
-
لَلّيسحَنْ بروحه الهـموم..
-
للضّاگ لفحات السموم..
-
للطيور الشهگت بچيلة
الصيد.
-
للثكالى الما يمرهه
العيد.
-
للحچي المكشوف...
والمضموم.
اهدي آهاتي .. فهي
قصائدي
و..
التقينا..
هاأنذا.. التقيك سيدي القارئ عبر ديواني البكر
هذا في الشعر الشعبي الموسوم- شذر الگلايد- لعلَّ ما أجد نصيباً من الرضا لديك قد
يخمد ثورة بركان القلق المستعر في جوانحي..
فَرُبَّ كلمةٍ من ثغر شاعر البست سامعها ثوب الفرح
وبثَّت فيه روح السعادة ورسمت لهُ خارطةً من الامل والتفاؤل..
وربَّ كلمة من ثغر شاعر قد اوقدت نار الحزن
والبست سامعها ثوب السواد وعمقَّت الجروح..
وما بين الجرح والفرح تتسامى المشاعر وتختلط الألوان
في اللوحة وتحتبس الأنفاس.. فينتعش الفجر الصادق...!!
وحتى ينبلج ذلك الفجر.. على الرهان نلتقي
والى الفرح.. لقاء الوعد..
كاظم
العطشان
تقديم
الطبعة الثانية
سادتي
القرآء والشعراء ...
له
الحمد ومنه التوفيق
ـ فقد نفدت الطبعة الاولى ــ
وتلك بين يديك ــ الطبعة الثانية مع ضرورات الحذف والاضافة والتنقيح وتلافي
الاخطاء المطبعية وبحلة وتصميم جديدين ...
ولعمري ان الطبعة الثانية تلك مبادرة أصيلة
تنمو عن تباشير الحرص والابداع من لدن الاخ الشاعر المخلص للحركة الشعرية اسماعيل
الرسام الذي اوجب الشكر علينا له وللعاملين معه.
ــ وما زال الشكر موصولا للاخ الشاعر الكبير
عريان السيد خلف الذي ترنم بصوته تاليا معظم قصائد هذا الديوان عبر برنامجه
المعروف (تل الورد) من على فضائية بلادي عام 2009م.
ــ وشكري ساريا لكل الصحف والمجلات التي أسهمت
بالتعريف اعلاميا بهذا المطبوع ومنها صحيفة المنار العدد 720 و 722 و 724 عام2010م،
وصحيفة صوت بغداد العدد 394 و397 عام 2009م، وصحيفة الدستور وطريق الشعب ومجلة
الشرارة والجنائن البابلية والكوثر والبيرغ والسنبلة وغيرها.
ــ وللاخ الاستاذ حسين القابچي،
والشاعر كريم جاسم الزيادي،(النجف الاشرف) كل التقدير والامتنان لما بذلوه معي في
هذا المشوار ..
وللجميع كل الاماني والتحايا المخلصة
كاظم
العطشان
النجف
الاشرف
07801423850
07709761958
حديث الوجدان
بقلم
الباحث
والشاعر
فلاح
الفتلاوي
كتبَ لي القدر المحُببّ، قبل عشراتٍ من السنين
أن التقي الشاعر والاستاذ كاظم العطشان وارتوي من سجاياه الأصيله جَذِلاً بما حواه
من يانع المزايا وترافه الخُلق....
وترسَّخت مع الأيام أواصر المودةَّ الخالصه
بيننا، رُغماً على قساوة الحياة وشرورها..
وانا
اتصفح ديوانه الشعري مخطوطاً بين يديّ والموسوم
(( شذر الگلايد)) أحسستُ بلسعات الغرُبه الروحيه
ومرارة الشكوى، وان من يرتحل معهُ عبرً محطاّته الشعريه سيجد بلا ريب حرارة اللوعة
الآسره وصدق المشاعر ضمن قصائدهِ المتعددة الأغراض
لقد غرفٍَ كاظم عطشان العطوي الحچيمي من مدينة
ابائهِ سوق الشيوخ في الناصريه- سوق عكاظ كما يقولون- مدينة الحبّ والفن والشعر،
الترنمات الاولى لموهبتهِ التي حَركها دبيب البردي وسعف الباسقات وحَدْي المشاحيف
وانين داخل حسن....
و مالبث انه انتقلت اسرته الى البصرة الفيحاء
قضاء الزبير بحكم اسباب الرزق والعمل فكان شط العرب الوسادة الثانية التي صاغت في
اسماعه الحان الحياة بايقاعها البصري العذب... وكانت النجف الاشرف ثالوث مستقره
الحاضر... مدينة البلاغة والحكمة والحرف النوراني.
لقد عرفتهُ شاعراً مجداً، لا يلهث وراء الشهرة
ويصدُّ عنها رغم عديدات الفرص التي لم تسنح لغيره الاّ انهُ أبى ان يمتطي صهوتها
وتلك رغبته وحسب.
فتَّشت في (فراگين) قطار كاظم العطشان وعشت
فصول قصائده وتذوقت كل المشاعر الاّ الفرح اذ كان عصيّا عليه.
فها هو يخاطب عريان السيد خلف في قصيدة (شذر الگلايد)
بوصف رائع.. اذ يقول:-
ياعريان.. يا شذر الگلايد..
يا مچمن دفو بليل اليسهرون...
يحلو السان بحلوگ القصايد
ولعلَّ ذروة الابداع الصوري في وصف أمه بل كل
الامهات في قصيدة (( گطرة وفه)): يقول:-
أُمي التشجر التنور بالآه...
ولا شبعت بطنهه وي اليشبعون
عجز بتهوفن بلحن الدلّلول
ولوحه
العجّزت بيكاسو باللون
ونراه في قصيدة وطنية أخرى (الفوّال) يصرخ
ليحرك الكوامِن الساكنه:
اجونه..
وگالو احنه العيد..
وحنه
الواحد بشوّال!!
لنهم حرمله عله حسين
والنبلة التيتـــــم اطفال
وكثيرة هي الصور في محطات كاظم العطشان... التي
نغادرها بهذه العُجالة ختاماً.. لنسجّل بمداد الاعجاب هذا المنجز الشعري البكر
آملين بترقّب ان يعقب هذا الديوان ولادات ابداعيه جديده وهو أهل لذلك..
مع
الحب والتقدير
القصــــــــــــائــــــــد
الى من
ينساب في روحي نهراً ثالثا
((
لعريان اُغنّي))
شذر الگلايد
كل
شي للحقيقه –
إيريد له اثبات!!
ونته..
الما عِزِت بالمجد شاهدِْ
وكل عيد التنِطرَه..
إير يدله اهلال!!
بَسّ صيتك...
سُبگ چَفّ اليعايد
ياَ مَچْمَن دفو..
بليل اليسهرون
يحلو إلسان بحلوگ القصايد
يا عريان …. ياشذر الگلايد
تظل.
ثالث نهر
ينساب بالروح!!
وتظلّ..
خضره وفياي...
وماي
بارد
يغوَّاص
البحر!!
منعوت طرواك
من ليلو
القوافي...
بشبچتك صايد!!
شفِت..
مَّره العُطش…
من عانَد الماي ؟
لوه
اُهروش الملامه!!
وخاوَه
المعانَد..!!
وسِمَعتَك...
من صحت للطّاح... ((ما يرتاح)) ([1])
حَكَّمت الضمير..
ولا رحت زايد!!
وشفِتَك...
من يطگ صبرك قناديل...
ابدهاليز الضمير..
العاثَت ابسِدّ الجرايد
يا عريان
ياشذر الگلايد...
والگلايد بيك... تتغاوه بشَذرِهه
يا ذَهْب...
ابو لعيبي العتيچ...
وغيرك..
بسوگ النخاسه انْحَط
گدَرِهَه
يلَمسنَّع...
من زغر..
حَدْ خَطَّة الشيب
يمعَدن...
ما صِدهَ... وساوم سعِرهه
شللَّه الواهِبَك!!
روح بها الأطباع!!
فحطنَه وياك...
ما طِحنهَ عله سرهه
بعِت.. عزّ الليالي!!
إبهَمّ المچدرات..
عالَن بيك..
بس صبرك عُبرهَه
جُمُوحِ...
مشذَِّبه
ومن هاشم الزود
سبُوگ..
ومُهرتك مَحَّد نهرهه
أَصيلَه..
مأ صَّله..
و بُرهانهه ايچيد..
وچذِب.. محدَّ گدر يوصَل لثرهه
عريانه القصيده!!
وبيك لبست ثوب ....
وي طوگ الغُوَه..
ايغازل
نحرْهَه
صحيح الماي..!
عدنهَ ايفيض خنياب
بَسّ الزود...
من مدهه وجزرهه
وصحيح
انجوم عدنَه
وتارسه الليل!!
تشِعّ ابزود...
چي لنّك گمرهه
والگلايد...
بيك...
تتغاوه
بشَذِرهه...
ركّ
الحيل
رِدْ..
بالطّيب دلاّلي...
وخذ منّي ...
بسواة الطيب دلاّلك !
وَفُضْ..
هاي الشراكه وياك !!
ودْعي بكل مسه..
العباس يبرالك..
ولا ظلَّن.. عُمر مسجون...
خوصة سعف...
بْسلالك
بعدْ...
ما بيّه.. ركَ الحيل...
يلكلّك شباب...
وعافيهَ احوالك
گظتنْي...
اسنينك المرات!!
وحْله من الشكر...
بالضوگ تحلالك
يغالي...
الشيب مَر جّناز...
ونته
ايعبّر الوكتين..
غربالك!!
تعال...
اتشوفني احجاره...
يعفْ
عنْهه الجدَم
ويصدْهه محچالك!!
عساك...
وي العساني البيه!!
والبيَّه...
وي مثل الصار .. يجرالك...
شلك
يمّي ؟
التريده انطيه
ولا غنّي عله حس الناي.. موَّالك !!
صِدَه...
وزنجر.. حچينه الفات !!
ذمَّه.
وظل سحر
معگود .. بذيالك !!
وحسدَه....
الما يفز بالليل!!
هنيالك
يخالي البال... هنيالك؟
ولا
مثلي !!
بكحل فنجان..
يسگيني المراره ابفورة ادلا لك !!
ولا
مثلي !!
السهر نيشان...
منحوت اعله هدم الليل.... تمثالك...
يشلاّل..
اليجف بجفاك...
يمته اعله العطاشه
ايفيض شلاَّلك ؟
ولو...
عمر الجزه الخمسين !!
ما عدّل رسْنَهه...
وسبُگ خياّلك!!
الك
فدوه..
العذاب الراح!!
من لا مت عِفَه عله الشوگ.. عِذّالك
حبيبي..
امحَلّلّ ومُوهَب !!
ونيني
وكل ضلع مكسور من شالك!!
حبيبي
...
ومبري كل ذمّه..
الدمع والنوح فدوه يروح لخيالك !!
حبيبي...
وسرّك وي الموت..
اموت بسّرك الچتّال...
كونه ايصير.. چتّالك !!
ولا
تنطر....
بعد شوّال
فك عاشور حزنه
بفجر شَوّالك
ولا
فرگه..
ونعدّ أيام !!
فارگنه النظر شنسوّي بهلالك
درد بالطيب دلاّلي
وخذ منّي ابسواة الطيب دلاّلك
عبّاره
شَيّمت
الجدم ع الموت
عبّاره
عله جسر الآه
والعلَّه برَِده البسكوت !!
نرضع..
من ثدي الحسبات
وبعين الگباحه انفوت
وسنون المناجل .. لوم
ما خَلَّت .. هِرش وبتُوت
واعدني ...
الصبر بسمار!!
يلزم خشبة التابوت
يونس
..
ما وصل بلواي..
من
صار عله بطن الحوت
ويردّ .. الصدى عله الصوت
من يگدر يردّ الحيل
يشتلني...
العطش بالگيظ !!
عاگول..عله درب الويل
عبّاره...
وگطعنه
اسنين..
تيل الماگطع عن تيل
من حملي..
عله حمل الآخ ..
والحمله عله گلبه ايشيل
محَّد ..
يلحگ
عله الطاح ..
لو هزَّه الوكت غربيل
غُربه...
ومن يمرهه اغروب
ليل
الينتچي عله الليل
يا خذهه.
العطش صيهود ...
ويردهه عله چفّ السيل
عثْرَتْ..
والسبگ محظوظ
ما
ساوت ركضهه الخيل
وانه
ولا سُويِت الغير..
حصتي من الغنيمه الذيل
لا نطعن گفه المجفين ..
لا
رمشه..عله بخت انميل
لا
مَلْسَن...
رِدَه وي الناس..
للتبِدي .. بلِسنَها اتعيل
من
حگنه ..
عله حگ الغير
ندفعهه
عله شِربَة مـاي
ونبيع
بسعر مادون !!
بلچن .. يقنع الشرّاي
وصْعدَ...
وي هَوه الدخّان!!
والحسره برماد اچلاي
حتّه الطَّور..
شحّ الطوَّر..
حتهّ الحزن ملّ الناّي
ويردّ الصده اعله الصوت !!
لوزَلّ البشر مگرود ..
منهو ايصيح الك مبخوت ؟
عبّاره...
عله جسر الآه ...
والعِلَّه برِدهِ البسكوت
سَگْطْ النده
عَزَّيني
المناية اتحوم
لو ملگاك ؟
لو مبخوت سِلْ سيفك !!!
وگْطَع..
كل نزاع القوُم..
نبلة حرمله وتختارهه بكيفك!!
وذِّر..
والچلاوي إصحاح !!
وشبَع من توذّر..
لو..
خَذتِ حَيفَك !!
لو يخمَدْ..
نبض معلول!!
لو تِكرمِ.. خواطر هاوية اتضيفك!!
أشرِد..
من لهيب اشتاك!!
لنّي اشّاه..
لنّي مراجف
بصيفك!!
وصيحن..
من حلاة الروح..
غرگان !!
وعليّ عَزَّت
مجاذيفك!!
أسيره.
ملجّمِه بزنجيل...
لا ترَحم أسرهه..
ولاجوّية حيل وتعيفك!!
وشل كل صَبرهه
وزاحت
الجيثوم
لنهة محزَّمه...
بزحمة سواليفك!!
مثل جنح الفراش ..
ايحوم ...
طيفي يواكح بطيفك
ومثل..
سگْطْ الندَه.. بلا صوت
شوگك.. ياكل بروحي
وصَبُر...
عِسر البچِرْ بجفاك...
أهيَّس
تطلگ اجروحي!!
نضح سَّمه.
العذاب البيك..
وتكاسر حنان...
ابطيب منضوحي
وَشَرْعِبْ..
حَدْ هَوه النِتّاگ!!
ولله الدَّوح...
ذَبَّن جرِشِ وي نوحي !!
لوَنيّ..
بشهگة الغرگان..
أشِمْ وشْمَكْ
وشدِّن راية العبّاس...
بسطوحي..
!!
ومِشَن..
ما عايَدن مكسور...
بس جرح الملامه..
أتبسمر بلوحي..
يمعذور...
الفرح معذور
ماشايف ورد ..
يضحك عله سفوحي ..!!
ولا شنيار..
عندي وتعتنيه الناس
لا هاون يدِگ..
لا ماي البلوحي !!
ولا وِذرَة لسان...
الگابحت مجفين..
لا ممذور طبعي...
ولا
طفح فوحي
ومثل ..
سگط الندِه...
بلا صوت...
شوگك..
ياكل بروحي...
الفَوّال
الى/ الفوّال الذي عاد سيداً في وطني
هدَّينه..
الرِسَن.. يحسين ...
بيد اليشتغل فوّال
يتخطَّه..
بگُواة العين
حَسباله صدگ خيّال
مَعَطْ
مُصراعهه...
ابكل
حيل..
عثرت والدرُب ميّال
هَدَّينه الرِسَنَ... ونباگ
كحل العين والمِكحال
اجونه....
وگالوا
إحنه العيد...!!
وحنه الواحد بَشوّال
لَنهُم...
حرمله عله
احسين
والنبله التيتم أطفال
اجونه.!!
والبعض
حفّاي !
لا..!
كلهم
بلايه انعال
حَط حِمله...
عله متني وگام...
شيّلني الگبل شيّال
بسم
الوطن.....
وسم الدين
سَوّونه حصو بمحچال
گطفونه....
عله
بير الظيم
والحال انتچه عله الحال !!
لمهمُ...
والوكت سكران!!
لصّ...
اتلاگه وي دجّال ؟
ذوله !!
الشدَّو عله الخيل !!
وحصِد ماي البغربال !!
صاحو بالكِنَز
فرهود...
وانطو
للشعب مثقال
بس عن الحرام نكول ...
شفنه الموز والنقال !!
يلغافي !!
اعله چفّ الطيف
وتناغي بصبرهه إليال
لا تنطر
سراب ايفيض !!
شطّ...
وترتوي الأجيال
ما يروي !!
النِده العطشان ؟
وِصْحَه...
الطيف ما ينشال!!
هدَّينه الرِسَن
والآه
نفس والآه والموال
وسنين التذم سنين
وهلال اليعزي هلال
والدوله عله جنح الريح
والريح بطبـــع ميال
والماله حزب مكرود
غصبن يشتغل زبال
هذا الشعب
شعب
حسين
شعب الفلح والعمال
شعب الروت منه الكاع
من سيل الدموم السال
شعب الزرعو العشرين
وتخضر
زلـــــــــــم وجبال
اذا درس الامس ما فاد
من طاح الضحه التمثال
بعدهي اعروكنه بشعبان
تغلي ...
ومن تطك زلزال
وبعدهي ساحة التحرير
وزنود النشامه حبال
وبعده الفاله
والمكوار
...
والليرات... والمهوال
ذاك الكال ..
(حل فرض الخامس كوموله)
ولِكل ّ
الطيبين.....سلامٌ وتقدير!!
ما
تنْصَحْ
هاي الناس.... ما تنصح !!
فوگ
اجروح....
درد الروح.....
من تجرح !!
ولو
وشلة فرح مَرّ بيك...
ما تلِگه الشريف....
البلفرح
يفرح...
ولا بيهم...
مَردّ الماي..
لو زود المطر يطْفحَ !!
و لابيهم ....
سگه
المذبوح....
وكت الموت من يذبح !!
و لابيهم ....
نصح
بالشَّور...
عن درب الغلط والصَح !!
إرضه...
بناتج
المقسوم!!
يمعَّود ؟
عليمن تجمع
وتطرح ؟
هاي
الناس..... ما تنصح !!
ذَبّابَة سلالي
بهور !!!
حَّي الله ...
الشباچ
شماغِنمْ.. لو شَحْ
يكلْهَه...
املوّنه وحُوَّاف !!
بس
يگرط ملحتك...
عافك امشلَّح؟
ولوّ..
چفّك لواه
العوز....
لا جار اليمَسّي....
ولا خَوي الصبَّحْ !!
ولَوْ...
چِفِك....
ندَِر بالهاك !!
لخيالكْ..
تمدّ
ارواحهه وتِسْدح...
شجاهه...؟
امحَّزمَه ابارود ؟
ومْضه
عله
النبض تجدَح !!
هاي...
الناس... ما تنصح!!
وشمتاني ؟
بسراب تفوج
!!
شمتاني ؟
بصبخ گيعانهم تِفلَح ؟
ومِن گال:
الدرب مامون ؟
وذيابه البشر... تمُرَح
ولو...
بز الردي بماعون...
بخت الهافي .... ما يربحَ
يسفْرهَ..
عله الصراط اتصير...
كل نيَّة گلب تنجح !!
هاي..
الناس...
ما تنصح !!
وكان الانتظار... مِلحًا في الجروح!!
عطر
تيروز
مُربيّه..
عله گد الشوگ!!
موش اكثر
وتانيك ...
عله دربك تيل
خاف عله الدرب ...
تعثر
ولِمّ روحي...
ورد شَدّات
وي طَبْتَك...
عطر تيروز
تطَّشرَّ !!
يبعد أهلي !!
الفرح مسجون..
جيتَك مَرحَمَه...
المسجون يتحرَّر!!
حبيبي...
العين الك تشتاگ
وتعاتِبْ رمشهه..
ابطيف ما تحضر
تعال...
الشيب... حَنّ وزار
ونته...
ولا تحِن يشگر
تعال...!!
الناس..كلهه اتزور!
بس جدمك حبيبي...
عله النجف... مامَر
تعال..!
إحسبني ابوك المات ..
وقره الفاتحه...
إعله المات... ما تخسر
شجاك...؟
وي الگِطع رَضّاع ؟
بس... ربَّك يسلطك...
ع الگِطع.. تگِدر ؟؟
دمر بّيه ..
عله گد الشوگ... موش اكثر
بعدنه احنه..
عله حَّطتنَه..!!
عله ذبَّتنه !!
ولا عنوانه ... اتغيَّر
بَعدنه..
ابّيتنَه من سنين !!
بيبانه كرب ..
والحايط مفطَّر !!
بعدهِ السِدرَه !
بيهه اعشوش ..
بّس عِشَّك..
بِنَه عله افراگ.. ماعَمرَّ
بعد كل شي!!
عله وكتك ذاك...
حتَّه الفرح..
ظل مقفول ... ومشَفرَّ
شجاك ؟
شبيك؟
ماهزَّك..
حنين البصره ... للمعشر
دمربّيه..
عله گد البيك ..
موش اكثر
هـــــــاك بهــــــاك
عذراً .. فأنيّ لا أملكُ غير هذه البضاعه !!
أنه بگدْ الوفه المذبوح
أوزِّن غيضي من أزَعلّْ!!
و لا زَيدن...ولا نقّص..
ولا جامل..
ولا أخجلَ !!
وزلّ
وي اليزلّ وياي
هاك بهاك ..!!
زَلّ بزَلْ !!
وصيرن..
گنطره لكل زين !!
طاهر بالحليبه ...
ولا شرب مَعْمَلْ!
ولا طبعي السماح..
وي
اليعضّ مكفاي !
ونْعَل روح أبو الينعل
وعَدَّن..
والجروح أقصاص
والبادي بِردَه السايات يتحمّل
وجرح..
من جرحني بيوم
ما
ساوم !!
ولا
عندي .... بهَوَه مَدَلَّلْ
وذِرْ جرحي
ملح علْ الراح !!
خاف انسه ..
الملح شاهود لليسأل
وبرُم ...
من رموشي اخيوط ..
أفرهنِ...
فرَّت المغزَل
وگدَّر
مُخيطي بگامه !!
وشِلْ بالخيط..
تَلّ
ابَتلّ
وچوّيهن..
عِفَه بساطور...
خافن... يبرن عله الشَل
انه ...
بغيضي عُبَرت ابحور !!
لا ردني...
ولا ثوب
بندِهَ إتبلَّل
گطعت.. بليل درب الغيض....
طر صُبحه ولگيت الحلَ
لگيت..ارويحتي
بوادي ..
ولگيت... اذياب فوگ التلَ
تناشبني ابمخالبهه !!
ولا
لي عله الدرب..
مُطلاع وتسلَّل
بعد..
وتريد منّي ارتاح ..؟
ياراحه البعَد تِسَهل ؟؟
حرِت ..
عُمر الصدگ ياصوب ؟
وتفرهد دَغش..
ووراگه تتبسَّل
وذْعِن....
مو
وهَن بالحيل ...
لا ذبني الوكت ..
والحال يتحوَّل
ولاني ...
بعازة العكاّز..
حته ارجَه
اليمدّ اچفوفه وتنوَّل
ولا دوّر...
فياي الطوف !!
لا كعَِّن...
ولا نام ... ابذَره الينذَل
ولا
زيدن ...
ولا نّقص..
ولا جامل ... ولا أخجَلْ
ذمْني
ذِمني.......
شما تذمني.... أرتاح !!
أخضرّ...
علشتايم عُود!!
ماي اليفرح الفلاّح
ذِمني...
ومن
تذمني... ارجوك..
اوجر بالعَدلِ والراح..!!
حطني...
بكلّ حظن منشار...
گصّ بيّه
الضلوع الواح..
سُولَه....
عله المذمّه ... ارتاح !!
ولا ذمَّك!!
وجيب العايَزهَ بطرواك ؟
يا نجمه... وچذِب تنلاّح !!
من ...
طبع
السُبوس ايطير..
لو طشَّه..
بَهوه المرواح
ويطيح...
الثگل للگاع...
بس...
طبع اليخُف..
ما طاح!!
ذِمْني ...
شما تذِمني... ارتاح
يلسانك....
بخور اهنود..
والنار التجيسه...
يشتعلِ
فوّاح !!
و نثرني ...
ابمهبّ الريح...!
والريح التطشني..
إعله المذمه اجناح
ونحْرني..
اعله جبلَة حَيف !!
وشكبره الفرح...
كوُن الفرح.. ذبّاح ؟
من حگك الورد...
يغتاض !!
لو
صَدَّ الندَه..
وما طاح !!
گطّعني...
ابمسه الگالات..
وطلعلك جديد...
بكل جرف سّباح !!
بير...
شما تحوُشه ايزود...
لو ماي الركد.. ينزاح
ذِمني...
اعله المذمَّه... ارتاح
الى/ التي فاقت في
دَللّولها كل موسيقى الكون ولوحات بيكاسو... انها أمّي !!
گطرة وفه
خطّـار الحزن مافـارگ البيت
ودَّعنَه الفرح ويَّ أميّ مدفون
تجي اطيوف التكحل العين وتروح
وامي التعتذر ندريبهه أتمون
ولو شحّ الفرح تتدايـن افـراح
ماتت والعـمر لسّاع مديون
وأمـي التشـجر التنـور بالآه
ولا
شبعت بطنهه وي اليشبـعون
ماَ نوَّخ ظعنهه لـعسر الاّيـام
وأمي
عله المصيبه اتـلولي وتهوُن
بس ضاگت مرار العوز چويات
تُفَور
الجدر خالي بدمع العيون
تضحك من تلچهه اجروح دنياي
وتحاذِر ما تگول اللّيش وشلون
عجز بـتهوفن بلـحن الـدلّلوُل
ولوحه العَجِّزت بيكاسو باللون
يناعور الـيرد بالجود عطشان
تسگي
وما روت من اليشربون
أمي الكل شبابي اسـنينهه اشموع
أمي
الجنه وامّي الدِين والكون
يا چف الصبر بچفوفهه اندار
يا
طور النُواعي البيه يـغنّون
لوله الأم فلا قَدَّح البــستان
ولا شفت
بِشجَرهه اتطگ الغصون
لوله الأم فـلا مقبول الصـيام
ولا
تقبل صلاة مـن اليعبـدون
وتظل صبخه بملحه الگاع مهجور
ولا ينبت
خضار وفاضت عـيون
هاي السمه وجبرائيل نيـشان
اذا زعلت الام العـرش محـزون
مو گالو الجنه تحت الاقـدام
عليمن نكتب وإلمن تسمعون
طحت
ولا زال النخلُ يموت شاخصاً...!
طحت ؟
لا .. ماطحت !! من گال ؟؟
صدْ
عينك تشوف الشمس تتبسَّمْ !!
نجم... وانه النجم... عَلَّيت !!
هَم شايف نجم..
بالفاس
يتهدَّمْ ؟؟
طحت
؟
لا ... ما طحت !!
غلطان..
والگَّلك سفيه.. وتوَّه للگالآت... يتعلَّمْ
!!
عُبرت ابحور...
ما تنگاش !!
سفّاني
حسرتي
وموجي ليل
الهَمْ
وتوچَّه..
عله
خلگ اجناب
ملفاهم زمُرهه... اتصيح لا تهتمْ..
طحت ؟
لا... ما طحت !!
چذّاب..
واليمشي بحچي الچذّاب..
لوبان الصدگ..
مبخوت يتشتَّمْ!!
وشتَمْتَك...!
واللسان ايطول!!
والبادي عله ذَمّ الناس... ما يسلَمْ
صدگ مرني
وي صبره العوز!!
دگ حافر
عله الناموس وتوسَّم...
نعم!!
نعم!!
والچنت ازامط بيه!
مَربيّه...
عله متني احمول ما َسلَّمْ
ولاأنكر!!
مُضيفي
اجروح!!
كل جرح
عله جرح الفات..
يتشيّمْ!!
وصحيح..
القهر دگ اثـبات!!
بس
صبري..
عله طول
الگاع من يلتَِمْ !!
ولا چذّب ...
شبعت من الوكت... فشخات!!
وتحدَّه
اللچحني...
وشاف
گطرة... دمْ ؟
ولا طاح...
النخل من مات
من شاف النخل...
فوگ
الثره اثلََّمْ ؟؟
ولا
صيحن!!
ولا همنَّ !!
دخل
يُهوَه العمر بايات بالسلَّم!!
ولا طيحن !
ولا ذلَّن !
ولا
أرضه ... بجرح يلتمَ !
تره....
البادي...
عله ذَمّ الناس..
ما يسلَمْ...
مو
... عنب
خلَّيتك ...
ابگلبي جرح...
يتعافَه ...
لو جَسّه المِلح ..!!
ونته ...
يا
مشمش شمَّرُك ؟
ليش ؟
منشارك عِمَه..
ولا
بّطلت بيّه الذبح ؟
وصّار ؟
ياشذر البتُوت ؟
الليل ما يلگط سُواده ...
شما .. يكحّل بالصبح !!
ونته !!
حصْرِم ..موعنب..
حتَّه اشتهيك .؟
ونته .. موقِمَّه ..سفح !
يَلْحيَمي!!
موچنت عله غصني ..
شدعوه
صاير؟
طير شلوه
وما يصِح ؟
وشدعوه
؟
دَچ ريش الحلال ..
وشلِت
أُباطك ..
گبل لايگوَه الجنح ؟
چاليش ؟
تتغاوه عله مامش ..
لا يباشه ..
الناس موعندك فِلح
طشّ الخرز ..
طشَّيته الك ..
عُمري الخسرته وچنت اظن ..
كَِّلك ربِح !!
فُرغَنٍ
..
فراگينه وخِفِت
بآخر محطهّ ينفضح
وغْلَط..
ومدحك من اذمّ...
واحتاز أذمّك بالمدِح..
ودريك ..
لاچن ما گلت!
بس روحي مجنونه ...
وتحب طبع الوكح
ودريك ...
مُر ماتنعِسل ...
ممذور طبعك ....
موسمح !!
خلَّيتك..
بگلبي جرح ..
يتعافه...
لو... جَسَّه .. الملح..
ناظـم
الى/ الذي لم تبلغ العشرين شموعه !!
گطع غصنك...
دبيب الموت !!
وشموع الصواني ..عله الگبر ضََّون
ولا جاسك..
هُوَه العشرين ...
والعشرين.... ماتمَّن!!
لبَِسْت ابيض...
غُوه المزفوف..!!
موبدلة عرس
وچفوفك
اتحننَّن
لبست اهدوم المودعين!!
بَدَّلته ابچفن ...
وجروحك انزَفَّن !
بَعَدهِ..
اخروصك مدلْيات..
توْهن
.. بالثُمرَ طگَّن !!
يناظم !!
توْ حِلَنْ بالعين...
وذياب المنايه ....
إعله النحر غطَّن...
ولا وكت الحصاد..
ولموَّ المحصول ؟
وسنُون المناجل... بالورد حزَّنْ !!
يا أبيض...
وسيع العين..
يلگلََّك معاني بحسنك التَّمَّنْ
أحط رسمك...
عله اوجوه التشبهك!!
ونقهر... وبچيك ... وصَّفَّنْ
اذا جرحك
شِفَه وي الموت!!
انه
.. اجروحي ندَّيه...
وبالگلب يدَّن !!
مِشَه وياك ..
الفرح زاتوت...
وطيوفه منهدَ فرگاك... ما وچَّن
مشيت...
ولا فرح دگ باب ..
وطيور السعد ع البيت .. ما حطَّن
ولو ..
عَدَّن.. چثير اسنين !!
انته..
تخضّر بكل يوم لو عَدَّن
عُمر...
ونته
بعُمر وياي !!
يوم
بيوم ...
لا زادن ...
ولا نگصَن
جزنّي.. اسنيني يبن أمّي !!
بذرَه الخمسين يتخطَّن
ولا دمع .. التعَذَّر بيك !!
حتَّه ابطور المغنّين !!
دمع اجفاك يتسلْطَن !!
مهي ...
اليال العزيز اسيوف !!
وسط الروح يتو چَّن
يناظم !!
من
رحت ترتاح ؟
ما تدري الليالي
اخلافك ... شسَّون ؟
ولا تدري !!
السنين اتبوگ..
ولله اسنين
..
موش اسنين .. يتسمَّن ؟
شبعنه ...
من
الوكت چويات !!
من
كثر اللّسع !!
ما ظل مچان اعله الأثر چوََّن
ولا جاسك..
هُوه العشرين ..
والعشرين...
مَا تمََّن !!
تساؤلاتٍ مشبوهة
ملاحظة: اجب عن جميع الأسئلة
ليش...
الليل
ما يغفه ؟؟
لان
ملح السهارى...
اينام بجروحه...!!
چاليش.....
الشمع يضحك ؟؟
لأن
ناذر.
ضُوهَ العِشّاگ من روحه!!
چاليش...
التزرعه ايموت ؟؟
چي ماي
النبع...
مغشوش بملوحه !!
چاليش......
المشيب
يعِيب ؟؟
لأن بيضه عله سَودَه..
اتصير
مفضوحه !!
چا....ليش....
السمچ ما نام ؟؟
چي
هاجرحبيبه....
وما هجر نوحه!!
چاليش...
النخل ما طاح ؟؟
مْتَعلّي عله هام الموت ....
شيلوحه!!
چاليش...
اليحطْ
ايطير ؟؟
ماشايف طُعُم مطشوش بسطوحه...!
چاليش...
اليحبّ ايخون ؟؟
كلمن طينته ... وماعون منضوحه !!!
چاليش...
الصدگ
من مات ؟؟
لأن صار الچذب ...
للناس مرجوحه !
چاليش...
من اننشدك ليش ؟؟
هاي اللّيش....
بيّه اسنين مذبوحه !!!
سبع
أبحور
أَزِمّ الروح...
للشَرّاي...
وبْدِي...عله اليحبْ
يبْدِي
وَغُصّ...
بلگِمة الزردُوم!!
للَحنّ ويغُص بعَدي
وجَزَّي...
الطيب سبَع ابحُور!!
أَعَدّي البلْوفَه يَعدّي
اليشيل..
اُحمولي وكت الضيج!!
أشيله..
ويَ الحمِل... وحدي
وَنْحر
جِبلَة الطيبين ...
أَعفّر....
بالأَثر خَدّي
ومْطُر..
والمحنّه أغيوم
بليالي الصبر تحدي
ولوذ..
بچلمة
التقصير...
خاف
ايبان مِن عندي!!
ولا
أشبرُ..
خطه
المجفين!!
لو باعو رُخص ودي !!
ولا
صيحن!! (( مثل عريان)) ([2])
من ساگ الضعن ردّي!
ولا لمِنَّ.. طِشاش الطّاح...
لا
ملْسَن تَعَّود..
بالِعفَه ايبَدّي!
أَبيعَنْ..من رصيد الآه...
وشري
البَسْمهَ مِن دَردِي
عليمن..
يا گلب حَنيَّت؟
والمن... يا جرح تِدّي؟
مكيّف..
ترگص
عله الشوچ.
وْحزامك سِفهَ البردي
ما صِخْ..
ما
تطخ للشور!!
((
نيّ)) طبعك طبع كردي
يگلبي..
اُنّوب
ما وصّيك...
وصَّيتك..
صرت ضدّي
شلَّك...
بالذهب مغشوش..؟
من كُونه بَسَنه.. ويِصْدِي؟
ولا
تچهَب..بحر سفّان..
ما ينگاش... بالمردي
الحُفَر
بيرك...
تره امتانيك!!
لِمّ.. اشباچهه وعَدّي
ما يثمر
ربَه الصفصاف..
لو
شفته... بذَرَه مسَدّي
ولا دمع اليخضّر فود..
لو فاض وكرَ بخدي
ريح العاشرت مِرواح..
بكشاش...
الهِفهَ تودّي
مِّمِّن..
والتُحوف أمراح!!
ما خاف..
بطرگ جردي
ولانام
عله
عين وعين
ما ظل
طُوش.. من چَدّي
وشِدَّن..
وعگد
المريوف
وحير
بعگدتي وشَدَّي
عليمن..
ياگلب حنَّيت ؟
وإلمن ..
ياجرح تدِّي ؟
شرد
أسولف
شرد أسولف..
من يدگ هاون سلفْنهَ؟
و يا
شليل. اليحوي غلطات الصديج؟
وانه عطّار السُوالف...
من تشِبّ... نار البگلبي...
تحرگ
العاصي بدربهه
و ما يطفّيهه الخَليج...
وانه.. ماي العگب
جزْره..
وانه
غيض الموج كلَّه..
الموج كلَّه....
من
يهيج..!!
شرد.. اسولف؟
بزَّو ابّير العوافي!
الچانو ايسمّوني باشَه!!
و
لونسو؟
سَمّوني...
بيج!!
ويلجروح..
اشلون بيچن ؟
يا
جرح منچن اداوي...
وكل جرح... بيچن غميج ؟؟
ماني
عَزَّبْت ... الخُواطر..
من عِفَه المجفين...
بلچن ...
من تحنّ العافيه...
اتعود بتدرايج
حِسَبتْ
أهل الكهف منهم يبذّات!!
وصمت هجرك فرض...
گبل التسابيج!
يمساگي...
الصبر بالويل..
من
طبع الجروح... اتهيج؟
جِبهتْهَ
اوياك!!
عسر
اطلوگ...
لا
حاصل يسر متعوب
لانَسمة ثواب.. بركضة طويريج
يلطاغي عله
هافي الريع
يلتشتل
چذب وتبيع
من كون الصگر تشويه ؟
شتنطي إمْهدِلات .... الزيج ([3])
زَمَّن..
من
خِدِرهِن... ما يكظهن عيب!!
وتناخن عرايه...
إمْنشّفات الريج ([4])
خَلْهِن.. لو عُصنَ !!
حمِل المتون اثگال!!
لا
باريت حملي...
ولا... فزَعت بضيج
ونعملّله..
عله
الصديج...
المارضه ايحطني بمزاد
وسامني..
برخص اليبيعون العتيج
شرد
اسولف..
شرد اسولف..
- الما يعرف الصگر يشويه -
مثل شعبي
شَوّاية
أصگور
تجيني أمرار أنزع جلدي مجبور
ولـبس جلد ثاني ونگلب
ذيب
وعَضّ كلمِن يصير بدربي مَسعوَر
ونْعَلْ سلفه كلمن يحچي
بالطِيب
لگيت الطيب سلعه بسلّته ايبور
ونباع الچذب بالسوگ
تعليب
وشفت جدر الصدگ ما حزِّمَه
الفور
ولاردّ الـيتمِْ عيـد المـلاعيب
عكس مجره التريده إحسابهه ايدور
ولو گدر النخل مـاهمَّه
تكريب
صحيح الماي فيضه ابزود
ناعور
لچن
ناعورهه ابزود الدواليب
انه معَزْب الموافه وخلگي ناطور
خلگ دّفانه وي وحشة
سراديب
ونه بطور عله حالي والخلگ طور
وسـلاْل الـردايه تودّي
وتجيب
ليش آنه من اسوّي الزين منكور
مثل ذمّ السمچ بس اچلته اتطيب
اعله عكاّزه من أواسي الناس مكسور
والصاحي من اعوزَه أعذاره
بالجيب
ووّزع
بالفرح با قات وزهور
بس بيّه الفرح لو مرني تهـريب
معدنهم دسيسه وگاعهم بُور
حيّه وبالرمل بس تگرص
اتسيب
عارفهم طلع شوَّاية اصگور
وسهام الگباحه اتصـيب
وتخيب
انه شما گول بس ما گول معذور
العذر حتّه العذر بالمستحه
ايعيب
ثوب الفِشل
أتِلّ....
ثوب الفشل....
تِلّ المجانين.....
وداري اعله
الگُصر
عن شوفه العين ....
ما طبّ الضُوه....
وكل عمري شباچ !!
حَلْهَه
اشلون ؟؟
ويطبّ الضوه امنين ؟؟
ما ظلّ .. عله ظنتي !!
البيه
گلت خوش !!
يا خوش الگلتهه ..
اتلاتهه الشين !!
ترَه...
إلسان الصدگ.. بالمستحه ايعوگ !
ولسان
الگبحَ...
علْ
المستحه ايعين !!
حسَّبت الصبر..
يگظيلي حسبات !!
گظاني الصبر... والظلَّن
مساجين !!
يلهوگني ...
اعله نار ادلال خطّار !!!
ويفر بيّه الفِشل .. فَرّ الفناجين
مَشّاني ..عله سلَّه...
القهر
صگّار !!
ذبْني ابزورته
..
ورگطه الثعابين
اتغذهَّ ..عله سمهه..
ولا گلت
آخ...
متعنّي
عله موتي ...
ولارضه
البين
ما فلَّت ...يروحي..
ودورهه اندار..!!
وي غَمَّ اليعيش
الضيم دورين !!
گلت:
يبُطنَ...
وحوك ارموشي غربال!!
اخاف
اعله اليسلِّس عِسر.. تبطين !!
گلت .
ألظُم خرزهه
شما دنه الشوف
وحط شا هودهه...
بصَفّ النياشين
گلت
:من گال ؟
كلّ الگال ... سّواه ؟
چثير
الشبرو عله اخيال ...
ُمخطين
حاَلْت..
من تحُوُل اتشّتِتْ الراي !!
وشليلي
من التعتعت...
صار نصّين
!!
مهي ..
شماغطَّت..
الغرگان غرگان !!
مقبول العذر
لوچلَّب ابطين !!
أتِلّ
ثوب الفَشلِ..
تلّ المجانين...
أوراق من حقيبة ٍ مهجوره!!
الورقة الأولى الشمع
نزف جَرحَه...
ودمعته اتشيط !!
شمع الذاب....
يبچي.. لحدْ گطاع النيط ...
من
گتله: الجرح يا ذيك ؟؟
واهم گال !!
راح اتفارك
وي الخيط !!!
الورقة الثانيه الصبر
مو مٌر عله حاله ...
ولا حلو بكل
حال
ها...
بين الصبح والليل...
خيط من السحر ينشال !!
بيه طعم الدوه الموصوف
يشفي ...من الگلت والگال !
بيه طعم الحياة اتعيش...
هم شايف ...
حياة اتعيش وي چتّال ؟؟
الورقة
الثالثه
الفرح
الفرح ..!!!
ما مرنه صار اسنين !
چي
... شرطي الحزن .. بالباب
خلَّه ...
اسلاك و صبابه ..
ومنع منّي الطلع والطاب!!
بس غصبن عليه الطيف ...
ليليه
التطبّ احباب !!
الورقه الرابعه الحرامي
ما أشتاگ..
لو نارك تشبّ ... اشواگ
ما
أشتاگ..
بس ..گوهَّ الدمع ينباگ
خلَّصت...
العمُر مبيوگ ...
ادَوّر عل حرامي الباگ
يا گلبي ...
شكُبرهه اتصير ؟
ناطوري وطلع بواگ ؟
غرشة
عجم
ليش تندهني وتبات
يلحنينك يشـتعل وبناري يشِْـعِلْ
يا
غرشة عجم ياقات
يا خمر اليُحوُل ومن حلاة النشوه يكتِلْ
مرعد
بروحي اشتهيك!!
برحي بصره... وعلسعف لو زعل يهدِلْ
ونته بربين العوافي!
الغافي بشطوط المسَدْيهَ..
وعاش بالظِلْ..
وانه...
كل
ظنتي عله ذاتك!!
يا
خليل الفضَّه خلگه...
وفاض
عَلخِلْ
خَلْ..
يظل تيزاب غيَضَك!!
مْعزِب بسُود الليالي..
وفرح ممِحِلْ
ماني شتله...
بلوح كلبك...
مادريت اسنون منجل...
تحصد الكلِْ
يا ألَذْ...
رشفة خصيم!!
و يا نديمي...
بكلّ عذاب الراح... والمجبِلْ
عذابك!!
والمحّبة احظوظ..
يابخت الهوُت..
من دون ليل طلوگ وتبهذلْ
أجالبهه !!
ولا ني
بقيد..
فر مغزلهه مِن يفتلْ
شنهي..
جابرني الدلالك؟
يللي تتبختر عفِهَ ...
ولوعات
تشتلْ
لا صحت بيك عله هونك؟
لا شكيت..
ولا سمعت الراد يعذلْ
ونته...
وحده
من المصايب..
هدّى روعك...
والبشر
مابيهه تحملِ
وصّفوك!!
الشمس عالو!
لنهه حَدّ وي الغروب..
الشمس وتفِلْ
ونته..
شمس الله الچبيرة!!
الما يضمهه اجناح دنيه..
ابليل وچِّلْ
ليش.. تندهني وتبات
ياغرشة عجم ياقات
يا خصمي..
ونديمي..
وكل عذاب الراح..
والمجبِلْ..
آخر
محطَّه
صوفرت ورگة الياس ..
ودَب دبيب العُطش بيهه
وگام يا
كلهه اليِباس
والعمر... بآخر محطَّه !!
وطوفي نَدَّه بلايه ساس
وطگن اعثوگي عله شيص !!!
وهذا
طبع الشيص !!!
من
يكبر تحگره الناس!!
وصارت اخدودي خشب مهجور !!
يا شفِّة خِشِف..
ترضه الخشب ينباس
صوفرت...
والشيب سِدرهَ!!
وكاس فَرَّغنه عله كاس
ولا شِبعنَه من الليالي ...
ولاصحينه ..
من الخِدَر بالراس !
وعله
ارحيل...
المهُر يصهِلْ ...
والليالي اتدور داس وداس
يا عونه ..
اليمرَّ الليل ...
مانام
عله حظنه
وگرّصه الوهواس
هفْتَتْ..
والسنين ارماد !
ما عَمرَّ... ورد ينجاس
يا عُمر اليجسَّه الشيب
بجدام الصبر .. ينداس
َحتَّتْ....
ورگة الماشين ..
خذْفَه ومن تهزْهه الريح
ما
تتْنَه عله طبرة فاس!!!
والعبّاس ..
كل ليله عله حظن الآه..
أموتن .. والمنيّه احساس.
والعّباس ..
والعّباس ..
ندْمهَ
رَّيض ياجدم بينه
بعدهِ اغروب ... ردِ بينه عله أهالينه
لگيناه
برخص مبيوع..
شوگ العُمر وسنينه
يأَوَّلنَه بعتب مشتول !!
طگ .. فشله بتوالينه !!
دريَّض .. يا جدم بينه ..
طفت وشموعنه عله افراگ!!
ما ضوَّت صوانينه...
وكرهنه..
الچان زلِفَه اشراع..
يتخطَّه بشواطينه
وذبح
بينه ..
الوفه بهجران ..
ما عفَّن
سچاچينه
وطبگ.. باب العرف نكران !!
ويسدسد روازينه !
وعله
الهامش..
سگينه اهروش ..
ماتت من
ملح طينه
وعله المامش
..
گطعنه ادروب
رحنه وبيش ردَّينه
وطلع..
ليل الصبر تيزاب ...
بس الآه تچوينه
وطلع ..
صفصاف ما يثمر
طلع كشخه ابساتينه
دريّض... يا جدم بينه
اليزتّ بسنينه الحلوات !!
رَدْ
جنّاز بسنينه..
وعله الخالي ...
صفه الغربيل ..
والمحصول خالينه
شبعدْ ..
تنطر شتال المات !!
بعد
الموت يحيينه ؟؟
غرگ..
والجود
بالسبّاح !!
ماشيَّم عضد سبّاح چفَّينه !
ولا حنّ
..
وتعافه
الحال..
شامت من زرگ عينه
وهذنيّ...
اسلالنه الخلاّي..
من
وشلة ليالينه
ولا بذر النثرنه ابلوح !!
حفنه
ادنان لميَّنه
دريّض...
والعمر بايات..
يتخطَّه عله خمسينه
وبياض الشيب طش
بالراس..
ينخه المستحه ايعينه
ورِدَّن...
والخجل رمحين..
ملگاهن
چلاوينه
وغيب بلا وعي ..
من الحيف
. .
أخاف العيب يطرينه
وحگ...
چفّ النگل بالماي لسكينه
وحگ..
گلبي النُبض ندمه بشرايينه
لتِلّ
الحيف..
تلو الحيف..
طلاّب وذكر دينه
وحَطّ الآه ..
فوگ الآه ..
أخاف انسه وتصحَّينه
ولا روفن جرح مغتاض..
ينِزف
...
من رِدَه الشينه
وعلْمَه...
عله الوكاحه اشلون ؟
من
تطفح مچامينه
وشرَّه..
عله الحبل شمسين !!
وطلعهْن بزازينه
وخلّي
..
المادرو يدرون ..
ولسان
الرِدَهَ ايدينه
دريض يا جدام ... بينه
بعدهِ
اغروب ..
رد بينه عله أهالينه
الفهرست
|
ت
|
الموضوع
|
الصفحة
|
|
1
|
لك.............................................
|
3
|
|
2
|
الاهداء
........................................
|
5
|
|
3
|
و... التقينا
....................................
|
7
|
|
4
|
تقديم الطبعة
الثانية .............................
|
9
|
|
5
|
حديث
الوجدان................................
|
11
|
|
6
|
القصائد.......................................
|
15
|
|
7
|
شذر الگلايد
.................................
|
17
|
|
8
|
رك الحيل
.....................................
|
25
|
|
9
|
عبّاره..........................................
|
31
|
|
10
|
سگط
النده....................................
|
37
|
|
11
|
الفوّال.........................................
|
43
|
|
12
|
ما تنصح.......................................
|
47
|
|
13
|
عطر تيروز.....................................
|
53
|
|
14
|
هاك بهاك.......................................
|
59
|
|
15
|
ذمني..... .....................................
|
65
|
|
16
|
گطرة وفه.......................................
|
69
|
|
17
|
طحت...........................................
|
73
|
|
18
|
موعنب..........................................
|
79
|
|
19
|
ناظم............................................
|
83
|
|
20
|
تساؤلات
مشبوهه...............................
|
89
|
|
21
|
سبع
بحور.......................................
|
93
|
|
22
|
شرد
اسولف....................................
|
99
|
|
23
|
شواية صگور
...................................
|
105
|
|
24
|
ثوب الفشِل
....................................
|
109
|
|
25
|
اوراق من حقيبة
مهجوره.........................
|
115
|
|
26
|
غرشة
عجم......................................
|
119
|
|
27
|
آخر
محطه......................................
|
125
|
|
28
|
ندمه.............................................
|
129
|
|
29
|
الفهرست........................................
|
143
|
-سيدي القاري-
على الحب نلتقي دائماً
ومحطتنا
القادمة
ديواننا الجديد ( ليل ومحطّة وسفر )
فإلى
الملتقى
-
بعونه تعالى -
ليست هناك تعليقات:
إرسال تعليق